اُسے پاؤں جمانے کو کنارا مِل گیا ہے۔۔۔ شاعرہ: نیلم ملک

 

اُسے  پاؤں   جمانے  کو  کنارا   مِل  گیا  ہے۔۔۔ شاعرہ:  نیلم ملک  

 

غزل…

اُسے  پاؤں   جمانے  کو  کنارا   مِل  گیا  ہے

بنے گا دوست اب دشمن اشارہ مِل گیا ہے

 

بہت روئے ہیں ماں بیٹا  کسی  کو   یاد  کر کے

بہل  جائے  گا،  بیٹے  کو  غبارہ  مِل  گیا ہے

 

وہ  میرا  خُودنِگر  ناراض   ہو  کر  جانے  والا

پلٹ  آیا  تو  میں  سمجھی  دوبارہ  مِل  گیا  ہے

 

سفر  کی  سمت  کا میں خود تعیّن کر  چُکی تھی

نجانے  تم  یہ  کیوں سمجھے ستارہ  مِل  گیا  ہے

 

ہُوئی  پل  بھر  میں  خاکستر  تعلّق   کی عمارت

بھرے  بارود  کو  جیسے   شرارہ   مِل  گیا  ہے

یہ بھی پڑھیں: مرے دل کی باتوں کو  وہ  جان  پاتا۔۔۔ شاعرہ : شفقت حیات شفق  

سہیلی ساتھ چلتے ہیں چل اِس کی چھاؤںمیں ہم

غضب کی دُھوپ میں اک اَبر پارہ مِل گیا ہے

 

ہیں اِس کے سَر وَرَق پر خار پھولوں سے زیادہ

ہمیں   اگلی    محبّت    کا    شُمارہ     مل    گیا   ہے

 یہ بھی پڑھیں: ایک ادھورے خواب کا منظر آنکھوں میں تحریر ہوا ہے ۔ کلام ایمان قیصرانی

 

چُھپا  کر  ذکر  کرنا تھا مرا شعروں میں اُس نے

سو  اُس  کو  جَل  پَری  کا استعارہ  مِل  گیا  ہے

 

کلام: نیلم ملک۔۔۔ نیلی آنچ 2019 سے انتخاب

یہ بھی پڑھیں: تہذیب حافی کی شاندار شاعری آپ کے نام