اکبر خان ملکانی ۔ جنت جاہیں۔۔۔ لکھت: اصغر گورمانی

 

اکبر خان ملکانی ۔ جنت جاہیں۔۔۔

لکھت: اصغر گورمانی

 

2010 دا سیلاب آیا تاں ساڈے پاسے ہر کہیں اپنڑے بالیں بچیں کوں نال گھن کہیں نا کہیں محفوظ چنڈ گٹھ دو پناہ کیتے ہجرت کیتی۔ میڈا مسئلہ اے ہا جو ابا جی ہونڑیں تے انہیں دے چارے بھرا ہکے ویہڑے وچ مقیم ہاسے۔ ول ساڈیاں بھینڑیں، انہیں دے بال ساڈے سوتر، انہیں دے بال نال دے غریب رشتہ دار انہیں دے بال ۔ ۔ ۔ ۔ یعنی ہک پورا قبیلہ ہا جیہڑا میڈے منہ دو ڈیہدا بیٹھا ہا۔ تے میں خدا کولو دعا کریندا بیٹھا ہانمی جو اللہ میاں کوئی پناہ، کوئی رستہ ۔ ۔ ۔ ۔ اے تلا بندے گھن کے کیندے در تے ونج باہواں؟ او کون اے جیہڑا ہک پوری جنج کوں پناہ ڈیوے۔ سویرے شام ڈراکلیاں خبراں ہن پانڑی فلاں جاہ تے پہنچ گئے، فلاں وستی تباہ تھی گئی اے تے فلاں قبیلہ ہجرت کر گئے، ول سارے خاص طور تے خاندان دیاں تریمتیں میڈے منہ دو ڈیکھن جو کیا سوچیے وی؟ میڈی اماں ضعیف ہن تے بیمار وی۔ انہیں دے چہرے دی پریشانی وی نہ ڈٹھی ویندی ہائی۔ بہوں پریشان ہانمی۔ ول بے اوچھنڑ تے خیمہ بدوش پناہ گزینیں دے لٹیجنڑ دے قصے انج پریشان کریندے ہن۔ بارش تے سیلاب ڈوہیں ساڈو کٹھے ٹُر پئے۔

ہیں پریشانی دے دوران اکبر خان ملکانی دا فون آیا خیر خوش تھئی۔ میں حال کیتم تاں انہاں فرمایا بلکہ حکم ڈتا جو فوراً بالیں کوں گھن تے میڈے کولو پہنچ۔ سرائیکستان ہاؤس تیڈے کیتے خالی کرویندا پیاں، سرائیکستان ہاؤس ہے وی تہاڈا، اصغر گورمانی کولو وڈا کیہڑا سرائیکی تھی سگدے۔

میں راتی رات سواریاں، ٹرک منگوائے تے سارے قبیلے کوں نال لیندا ڈی جی خان اکبر خان کولو ونج پہنچاں۔ سرائیکستان ہاؤس جیہڑے دوست ڈٹھی ودن انہیں کوں علم اے جو ایندا مین گیٹ ہر ویلھے کھلا رہندے اکبر خان ملکانی دا دیرہ ہے ہر ویلھے مہمان آئے گئے رہ ویندن لیکن جتنا عرصہ اساں اتھاں رہ گئے سرائیکستان ہاؤس دا مین گیٹ پردے پاروں بند کر ڈتا گیا۔ سویرے شام اکبر خان دا کوئی عزیز بال آوے، ضرورت دا پچھے تے ضرورت دیاں شئیں پہنچا کے لگا ونجے۔ مجال اے جو انہاں ڈینہاں ساکوں کہیں شئے یا کہیں گال دی پریشانی تھئی ہووے۔ سیلاب ٹل گیا، مصیبت ہٹ گئی اساں ولا اپنڑی وستی ول ایوسے جو اپنڑے گھر دا احساس تاں سرائیکستان ہاؤس بارے وی تھیونڑ پئے گیا ہا۔

اوں سیلاب دے بعد اکبر خان نال پیار محبت دا ہک سلسلہ ٹر پیا۔ کہیں کہیں ویلھے سوشل میڈیا تے یا آمنڑے سامنڑے کوئی پیار بھری چونڈھی وی شرارت طور پا ڈیندا ہانمی مقصد انہیں دے جوابی جملے دی چس چانونڑ ہوندا ہا۔ میڈے ویہڑے دی ہر خوشی تے ہر ڈکھ وچ اکبر خان میڈے نال آ بیٹھے تے ہر ویلھے اوہا پناہ محسوس تھئی اے جیہڑی 2010 دے سیلاب وچ انہاں میکوں ڈتی ہائی۔

اج سویر نال خبر ملی اے جو اکبر خان ایں فانی جہان توں جھوک لڈا گئے تاں ایویں محسوس تھئے جیویں دیرے نال پناہ آلا رشتہ ختم تھی گیا ہووے۔ بہوں مونجھا ہاں یار۔ سیانڑے آہدن لکھ مرے لکھ پال نہ مرے۔ اکبر خان اساڈا لکھ پال ہا۔ اللہ پاک اوکوں سب توں سوہنڑی جنت عطاء فرماوے۔ آمین۔

اصغر۔