غزل۔۔۔۔۔۔ کلام مرتضیٰ ناظر

 

غزل

کلام: مرتضیٰ ناظر

 

اصل دی گول ءچ اساں ہمیشہ نقل کوں بھوئیں تیں اچھال چھوڑیئے

ہے سیک سک دے جگر پگھاریا ہنجھوں اکھیں کوں اگھال چھوڑیئے

 

کوئی ٹھگ ہا بھانویں یا ہا کوئی مخلص اساں ڈوہائیں کوں رنجایا کائنی

ہیں پیار والے دے نال رو پئے ٹھگی کوں کھل کیں ٹھگال چھوڑیئے

 

اساں حقیقت دے ایں سفر وچ ہے دل فراغی کوں پیار کیتا

نہ پل بھلیئے ہیں نہ پل رلیئے ہیں بھلیئیں کوں رستہ ڈکھال چھوڑیئے

 

نہ کھوٹ نیتیں دے وچ رکھیا ہے کتھائیں کھٹے نئیں کتھائیں ہٹے نئیں

نکلدے گئے ہیں سنبھلدے گئے ہیں ساکوں فقیری سنبھال چھوڑیئے

 

نسے وڈیپے دا بھوگ بھوگیا نیاز مندگی ہے راس آ گئی

نہ من سڑیئے سے نہ تن سڑیئے سے ساکوں محبتیں دھنوال چھوڑیئے

 

اساں تاں منڈھ لا دے ہیں نمانڑیں نسے سیانڑیں تیکوں پتہ ہے

تیڈی طلب تاں نئیں چھوڑیا ساکوں نہ ماضی چھوڑیئے نہ حال چھوڑیئے

 

اساں تاں ناظر وفا دی وستی آباد کر کے آباد تھئے ہیں

عروج پاتے عروج ساڈے مکا مکمل زوال چھوڑیئے

 

کلام: مرتضی ناظر