SARAIKI POETRY
مٹھڑے بول سرئیکی دے۔۔۔۔
ساڈی مٹھڑی تیں بہوں سونہڑیں ماء بولی سرائیکی بہوں پرانڑیں بولیں وچو اے تیں اے پاکستان، ہندوستان دے نال نال کجھ بئے ملکیں وچ ای الائی تیں سمجھی ویندی اے۔ ایندے الاونڑ دا انداز کجھ علاقیں اچ مختلف تھی ویندے پر ایندی مٹھاس اچ فرق نہیں آندا۔
اج میں تھہاڈے نال کجھ سرائیکی شاعریں دا کلام ونڈینداں، امید اے جو اے کلام پڑھ کیں تھہاکوں وڈی چس آسی۔
ساریں کیں پہلے میں آپنڑاں ہک قطعہ آپنڑیں بھراویں وستے لکھداں۔ میں سرائیکی ادب دا ہک نکا جھیاں طالب ہاں اگر کتھائیں غلطی تھی گئی ہووے تاں اکھیں پھیر گھنسو
قطعہ۔۔۔
#سچ سارے سراب تھی گئے ہن
کوڑ تاں لاجواب تھی گئے ہن
انسانیت بھا دو ٹر پئی ہے
کوڑے جناب تھی گئے ہن
۔۔۔۔۔۔۔۔۔۔۔۔۔۔۔۔۔۔۔۔۔۔۔ فاروق شہزاد ملکانی
غزل۔۔۔۔
پگھر جے تک گلاویں تئیں نی پجدے
کڈاھیں رزق تھانویں تئیں نی پجدے
کینجھا منصف ھیں کینجھا خیر خواہ ھیں
تیڈے کن وی صداویں تئیں نی پجدے
ساکوں سسڑی دی شاید بددعا ھے
اساڈے گھوٹ لاویں تئیں نی پجدے
اساں تئیں نال بر کیویں میچیسوں
ساڈے سر تاں پچھاویں تئیں نی پجدے
میں یوسف کائےنمی پر قید وچ ھاں
میڈے سنہیئے بھراویں تئیں نی پجدے
ھمیشاں ھنس والا ظرف رکھیں۔۔۔۔
کڈاھیں لعل کانویں تئیں نی پجدے
اتھاں کوئی کیا بھلا انصاف پیسی
اتھاں مجرم سزاویں تئیں نی پجدے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فیض بلوچ
غزل۔۔۔۔
میں تیڈا منتظر ھاں مدامیں کنوں
اےتلا نئیں رسیندا غلامیں کنوں
سجھ سلامت کھڑے بلب بلدے کھڑن
کتنے بے خوف ھن شہر شامیں کنوں
خیر تھیوے سخی وقت ڈینونڑ لگے
زھر دے ذائقے خوش کلامیں کنوں
کےتلے تئیں نویں نسل حاصل کرے
ھر برا مشورہ نیک نامیں کنوں
مفلسی ھنڑ حویلی تے پہرے نا ڈے
تھک چکے ھیں اساں احترامیں کنوں
سچ الاونڑ دے عوض ملے جے قدر
دار بہتر ھے سارے مقامیں کنوں
ھتھ قلم تھیئے تاں خادم خدا جی چھڑائے
جی حضوری کنوں ست سلامیں کنوں
۔۔۔۔۔۔۔۔۔۔۔۔۔۔مصطفیٰ خادم
سرائیکی اچ تریمتیں شاعریں نے بہوں گھٹ شاعری کیتی اے لیکن جتلی وی کیتی اے بہوں کمال کیتی اے۔ صباحت عروج صاحبہ دے کلام اچو کجھ پیش کریندے ہیں۔
غزلاں۔۔۔
چھت تا سر تے ہے بھانویں در کائنی
کون آہدے جو میݙا گھر کائنی
چندر تارے تاں او لہا اوسی
ݙاڄ ڳاہݨے دا اوکوں پٙھر کائنی
چار لوظیں دی مار ہاں لیکن
تیڈے لوظیں دے وچ اثر کائنی
میں خدا دی ملوک مٹی ہاں
تیکوں لگدے جو میݙا شر کائنی
میڈی حالت تاں ݙیکھ کیا تھی گئی
اہدئیں نکھڑن دا میکوں ݙر کائنی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جیرہا میݙو آوݨ لگدے
تیݙے کولہو ٻاہوݨ لگدے
ٹوبھے چِکڑ دھوڑ اندھاری
سکھ دی بھوئیں تے ساوݨ لگدے
میݙے نال تاں رام ہا کوئی
اوندے نال تاں راوݨ لگدے
بچ پوسی کہیں ماء دا ٻچڑا
تیڈا تاں ٻس آوݨ لگدے
تیݙے شہر دا کتا بھونکے
میکوں ڈات پچاوݨ لگدے
ہیجڑے وانگ ہے زندگی میݙی
میݙا روونڑ گاوݨ لگدے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس ہینݨیں عورت ݙیکھ کنے
ہر ڋاڈھا شخص خدا تھی گئے
ایویں گالہیاں گالہیں ہوندئین ہن
ہر کوئی پچھدے تیکوں کیا تھی گئے
اگے پردے عیب تے پیندے ہن
ہݨ پردہ ݙیکھ ردا تھی گئے
تیݙی مونجھ کنوں منہ پیلا ہے
میکوں لوک آہدن صفرا تھی گئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رب دی ذات دا ٻہوں احسان اے جڳ تیں عورت ذات بݨائ ہس
جیکر ما تیں بھیݨ نا ہوندی مندا مرد کوں جھلݨاں پوندا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اساݙے ہتھیں قلم تاں کوئینی نصیب لکھݨاں سکھاوں نسل کوں
اساݙے ہتھیں ٻوہاری ہئی پئی اساں نصیبیں تے پھیری رہ گئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہتھیں اتے ڈھیر لکیراں پر نصیب اروڑی
ذات دی بھانویں اُچی ہوساں لیکھاں دی میں چوہڑی
کُل حیاتی کھے کھادی اے نہ مٹھی نہ لوݨی
آکھے میکوں بختاں آلی ماء میݙی ہائی کوڑی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فقیری پاء کے ٹُردے ہیں تاں لیراں پیریں اڑ ویندئین
خوشی دے پندھ کریندے ہیں تاں ہنجوں ول اپڑ ویندئین
اساݙے شہر دی مٹی دے وچ ہی کوئی عِلت ہے
اُداسی کوں لہیندے ہیں اے بیلاں وت پُھپھڑ ویندئین
کتھاں کوئی جاہ؟ خدا دا گھر جو اے محفوظ رہ ویسین
او قبراں وی مصیبت ہن جتھاں چھورِیں سمݨ ویندئین
لِیوّنی رن دے وانگوں ہن دعائیں وی ساݙیاں ݙیکھو
پِچھو جو ٻال چیکن پئے او اُتیں ون٘ڄ تے کھڑ ویندیئن
اساں مدتیں توں اپݨی بے بسی دا بیج بوندے رہہے
جے بئی کوئی کھاد ݙیندے ہیں اتھاں فصلاں اُڄڑ ویندئین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔صباحت عروج
اج دی رات
اج دی رات ہے رج کے رو گھن
اج دی رات ہے کُھل کے کھِل گھن
میں وی ملداں توں وی مل گھن
کل ایہے حالات نہ ہوسن
ڈکھ سکھ دے صدمات نہ ہوسن
روون دی اے رَو نہ ہوسی
کھلسوں تاں او کھِل نہ ہوسی
دھڑکن ہوسی دل نہ ہوسی
جیون دے کہیں موڑ تے اساں
بے خبری دے نال گزرسوں
اساں اپنے آپ توں ڈرسوں
اپنی جان سنجان مُکرسوں
یا ممکن ہے ایں وی ہوسی
دل روسن تے اکھ نہ روسی
توں ہوسیں تے میں نہ ہوساں
میں ہوساں تاں توں نہ ہوسیں
یا ایں ہے ڈوہیں نہ ہوسوں
ہوسوں تاں سونہیں نہ ہوسوں
روون چہسوں رو نہ سگسوں
کھِلن پِنسوں کھل نہ سگسوں
ملن منگسوں مل نہ سگسوں
اج دی رات غنیمت سمجھوں
ایہا اپنی قیمت سمجھوں
اج دی رات ہے رج کے روگھن
اج دی رات ہے کھُل کے کھِل گھن
میں وی ملداں توں وی مِل گھن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔عزیز شاہد
غزل۔۔۔۔۔۔
چار ڈینہہ دی یار ہوندی ہے ایہا
چاندنی کوں مار ہوندی ہے ایہا
مونجھ دا اروار تاں گھر ہے مگر!
پار ونج تاں پار ہوندی ہے ایہا
شرم ہک ایجھیں ادا ہے حُسن دی
ڈو مونہی تلوار ہوندی ہے ایہا
توں بیٹھاڈردیں جہڑی رُسوٸی کنیں
عشق دی تاں ۔۔۔۔۔۔بار ہوندی ہےایہا
تہوں تاں چھت دی دروکڑی آہدن ایکوں
کوڑدی رفتار ۔۔۔۔۔۔۔۔۔۔۔ہوندی ہےایہا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔جمشید ناشاد
غزل۔۔۔۔
شالا بخت کوں ڈھا نا لگی
کٸیں بدبخت دی ھا نا لگی
اماں آدھی ھوندی ھاٸ
بچڑا تَتی واہ نا لگی
اپنڑی آپ جوانی مانڑیں
شالا کٸیں دی آہ نا لگی
کٸیں مسکین دا دل نا توڑیں
کٸیں دا ٹھڈا ساہ نا لگی
تن من ساڑ سوا کر ڈیوے
شالا عشق دی بھا نا لگی
خلقت نال پیار کریں تو
بس دنیا دی چاہ نا لگی
فیض وسیلہ۔۔ اللہ ھووی
کٸیں دشمنڑ۔دا۔۔۔۔دا نا لگی
۔۔۔۔فیض حمید فیض روکھڑی
بابا سئیں فرمیندے ہن
ساڈا ویلہ چنگا ویلہ ہا
ساڈا ویلہ سادا ویلہ ہا
ساڈے ویلے پگ دی قیمت ہئ
ساڈے ویلے ڳال انگوٹھا ہئ
ساڈے ویلے پردہ اکھ وچ ہئ
ساڈے ویلے گھریں اچ باریاں ھن
ساڈے ویلے یاریاں یاریاں ھن
ساڈے ویلے قاصد پکھݨو ہن
ساڈے ویلے وقت پچھاویں اچ ہا
دھوں ڈس ڈیندے ہن وسوں دی
ساکوں تارے رستہ لیندے ہن
اے بابا سئیں فرمیندے ہن
جتھ شہر دا چوک ہے اوں ویلے
اتھ ساڈے جوڑے واہندے ہن
جتھ کوٹھی ھے سرداراں دی
ایں ڄاہ تے بوھڑ ہوندی ہئ
ڄتھاں ہاڑ اچ مال بدھیندا ہا
بابا سئیں فرمیندے ہن
ساڈے گھر دے نال کراڑاں دا
ہک کھوہ ہئ واہندا راہندا ہئ
ھک چھٹ درباری لٹھاں دی
اتھ پاݨی آݨ کے پیندی ہئ
او پیار پریت دا ویلہ ہئ
نہ لٹھے کلمہ پڑھدے ہن
نہ کھوہ دا پاݨی کافر ہئ
۔۔۔۔۔۔۔۔۔۔۔۔مخمورقلندری
0 تبصرے